最Cool保安產品

最近每個禮拜，都收到豬扒收購消息。雖然美國經濟無乜起色，但係類似豬扒呢類公司，超過一半收入來自海外，反而大把現金進行收購。剛剛收到消息，豬扒又買起專門做虛擬化保安嘅 Altor，而上星期就買咗專門做視像傳送嘅Blackwave，之前一個星期就收購專做無線網絡嘅Trapeze，呢個刁以現金支付，盛惠一億五千二百萬美金。

Trapeze以前嘅香港區經理Samuel Liu，好積極發展本地市場，Trapeze响香港有唔少客仔，後來Trapeze被 Beldon收購，調去亞太區做銷售支援，應該跟住加入豬扒，以後有多啲機會見面。

豬扒嘅老總Kevin Johnson收購，幾乎全部以現金支付。不過同豬扒做防火牆嘅安迪．梁講起，原來研究機構Gartner今年曾經選咗Altor為今年最「Cool」保護數據及基建產品。Altors原來係由以前Checkpoint員工創立，原來二OO七年已經有產品，目前進入第三代產品。呢家公司早就有同豬扒合作。

另一家榜上有名嘅最「Cool」產品叫Boole，應該無乜人聽過，唔知係唔係以英國數學家George Boole為命名。George Boole大家可能唔記得，不過佢發明嘅Boolean Value，公認係電算科學嘅基礎。Boole專門係做數據保據，最近請咗剛離開MTech嘅銷售經理Gene Lim。Boole總部响盧森堡，明年搬去美國矽谷。係少數從歐洲創業嘅IT公司，响歐洲有唔少客仔。Gene正在為Boole物色渠道。一般數據保護工具，例如咪記只能保護番自己文檔，其他品牌又唔係咁易用。Gartner話Boole嘅功能多又易用，所以值得注意。

最近有儲存方案商參加IT會議，先至發現F5將唔少儲存方案商列為競爭對手，嚇咗一跳。其實F5積極推廣佢哋Big IP嘅廣域優化產品，同儲存設備NetApp同日立等夾解決方案。不過即使做開廣域優化嘅河床，亦推出咗「白水」（Whitewater），針對優化遠端儲存，儲存市場愈來愈熱鬧。