K場科技

唱片公司因為版權問題，同電視台嗌到面紅耳熱，原來同卡拉OK亦唔係好過。最近搞南華班主搞咗家新K場Red MR，結果另一家打前台，以後大家捧四大唱片公司歌手，可以去新場。

Red MR用咪記久聞樓梯響嘅Surface技術，請咗以前有線靚女陳貝兒，一見之下，果然好高，幾有明星相。不過同咪記孖屐亭Joelle講起，原來佢同羅先生位名模太太兼填詞家梁芷珊，同係庇理羅士女中校友。今年庇理羅士已經一百一十周年，佢另一家母校港大，下星期亦踏入一百周年紀念，同辛亥革命一齊慶祝，兩家母校都變咗百年老店。

另一位咪記公關部Wence小姐，原來係聖士提反女校優質產品，唔怪之得咁玩得食得，論盡全港餐廳熟過阿蘇。不過聖女要等多五年，先至一百歲，校友陣容亦唔弱。五年後，話唔定有位特首校友，范太同葉太都係舊生，分分鐘兩隻馬落場跑，但只能買獨贏，唔可以買位置Q。

唔講賭馬，同Joelle講返IT產品。今年咪記最有噱頭，當然係Xbox Kinect體感遊戲，佢話跟住Lady Gaga跳舞，減肥好快，信不信由妳。唔想買住，可以去Red MR試吓，但Janis陳話預約房間要幾個月，識得佢可能快啲。不過最近女主播經常俾人狂追，唔好惹人誤會。

頭條日報推出iPad版，單撈次數爆燈。其他平板電腦落力推銷，不過缺乏咗位孤獨推銷員，仍黯然失色，有啲餐廳用iPad嚟做酒牌菜牌，加價唔駛貼紙仔。其他廠家嘅七吋平板，電視報紙做宣傳，即使做到除剩底褲，始終差啲。