2010年12月23日星期四

O記大會 啤酒任飲


O記北京開用戶暨開發商大會,參加者達一萬三千人。亞太區老頂Steve Auyeung當然好高興。不過今時今日,甲骨文已經成為好多家公司,加埋太陽電腦, WebLogic,一大堆應用軟件,其實係好多家公司。不過,O記老頂Larry一向鍾意大場面,三藩市嘅O記大會參加人數四萬人,加埋佢哋在巴西嘅用戶大會,全球參加人數超過六萬。三藩市嘅O記大會,幾乎變咗當地每年盛事,Steve話三藩市舖頭,都向參加者俾折頭。

今次亞太區大會,唔見咗拍乸富士通作為主要贊助,但係加入青島啤酒。青島啤肯定係O記最大用戶之一,點解會變成贊助商?真係令人O咀。青島做贊助,當然啤酒任飲,不過北京天寒地凍,真係無福消受。

另外英特爾同埋HP亦係白金贊助。O記大力發展處理器,宣傳Sun Sparc T3,聽聞話每粒T3內核嘅數據庫授權費,仲可以減價五成,好多O記用戶動心。O記又推數據庫機器Exadata同中間件機器Exalogic,加埋剛推出可行DB2SuperCluster,追住I記嘅P系列同HPSuperdome嚟打。下年HP同英特爾仲會唔會參加,真係唔清楚。

不過O記市場始終夠大,HP亦第一次响會場,展出咗3Par真身,唔少同業都好感興趣。­

聽台灣同業講,HP以前嘅香港靚仔老頂,台灣董事長Felix See已經請辭,年底正式離職,回港加入一家上市貿易公司老總。Felix係全台灣最年輕IT老總,調職到台灣辦公室,正值人事大變動,不過佢在位兩年,克服困難,功成身退。

沒有留言:

發佈留言