河床養海魚

河床年尾開拍乸大會，出席人數愈來愈多。據河床孖屐亭阿頭嘅標丁先生話，床河從二OO五年上市，收入從二千二百幾萬美金，增長到舊年五億五千二百幾萬，六年升咗二十五倍，基本上年年增新高，而今年頭三Q已經五億二千幾萬，可以肯定破上年紀錄，年年創新高。
港澳區銷售轉咗由Ricky做HP，所以HP嘅技術服務都積極參加。另外其也銷售渠道亦有好多電訊商。今年嘅重頭戲，首先講嘅竟然係做網絡加速嘅Steelhead新作業系統RiOS 7.0，呢個OS加入好多強勁嘅功能，終於可優化UDP協定。河床已經佔去廣域優化市場超過五成，唯有推出新產品增加收入，上年推出白水（Whitewater）同瀑布（Cascade），而Cascade亦成功打入全港最大銀行，今年收購咗兩家軟件公司，合併產品線叫做魔鬼魚（Stingray）。標兄話其實佢哋嘅網絡優化產品Steelhead係鱒魚，特點係速度好快，新產品點解叫魔鬼魚，佢就唔知。
河床嘅產品以水流同魚類命名，算幾貼切。但魔鬼魚算係海洋生物，應唔會响河流生活，可能已經流出大海。
河床嘅工程師Barany Mok介紹Stingray嘅Traffic Manager，以前收購前叫Zeus，功能包括負載平衡，亦即係F5嘅競爭對手，大部份河床拍乸都有做F5，真係威脅唔細，而家見到Linda可能面左左。Stingray亦包括專門優化Web應用嘅Aptimizer，專幫網站做單向加速，Barany話其中一個大客仔嘅Sharepoint.Microsoft.com，加速Sharepoint性能達四倍幾。
國內富士康牽頭嘅網購「飛虎樂購」生意唔好，從B2C綜合商城，轉番做「3C」；即係集中電腦、通訊產品及消費電子產品，近期成為國內大新聞。聽講CEO杜家濱亦離任，呢位杜先生大有來頭，曾任咪記首位中國區總裁，然後又擔任過思科中國區老總，跳槽到飛虎樂購。如今郭台銘親自操盤，唔知可唔可以起死回生。不過郭老總做代工稱王，唔少評論幸災樂禍，話以管工廠方式做零售，結果老虎變成病貓。