FortiNet四圍吼收購機會

上星期遇見FortiNet南亞及香港地區總監鄭敦隆，Q尾嚟香港追數兼講業務。呢位鄭先生係馬拉人，負責睇東協國同埋香港共十個地區，有唔少發展中國家，佢話近期柬普寨發展賭場，生意唔錯，上季FortiNet收入上升百分之三十七，手頭現金達到五億美記，老細謝青亦要想辦法做啲收購，以免俾人話太保守，變咗守財奴。

原來FortiNet推出唔少新產品，最近就推出無線網絡存取點FortiAP，亦即係WiFi無線發送接收器，傳統上AP必須連接控制器，先可以集中控制同漫遊，FortiAP就直接連到FortiGate防火牆軟件內嘅控制器，不另收費。控制器結合防火牆，又可以順便保護同控制用戶行為，一舉兩得。

據區域經理Cherry話，部分學校同商場用咗佢哋防火牆，近期升級到WiFi無線網絡，只要購買AP就可漫遊，支援8個SSID，反應唔錯。

鄭敦隆話FortiNet手頭有成五億現金，結果舊年只成功收購咗一間叫SwitchTalk嘅公司，而呢間公司竟然係做IP-PBX，即係IP電話交換系統，而且完全支援SIP，佢話其實FortiNet亦有出平板電腦，叫FortiPad，利用Android作業系統。响防火牆內加嘅電話系統，可說係前所未聞，鄭敦隆笑笑口話絕對唔係挑戰思科，因為兩者相差太遠。但FortiGate防火牆睇嚟愈來愈抵用，則肯定係事實。鄭敦隆話手頭現金太多，經常留意有乜好買，請大家幫吓手。

不過FortiNet人事流動性似然唔低，另一位Eric又去咗MTech。但FortiNet已經同MTech斷絕分銷關係，以後要搵蛇仔。而家FortiNet兩位高層都係由H3C過檔。聽講明年H3C亦會主力推無線網絡系統，加上豬扒Trapeze，市場好熱鬧。