十年後ICT變成點？

歐美經濟麻麻地，但係本港IT仍做到手軟。本港數據中心業務仍然強勁，際主要電訊商，好似SingTel、OBS、I記同埋谷歌，紛紛擴充本港嘅數據中心。行家話，好多周邊地區工作交由本港支援，做到氣咳。

新興市場對電訊公司的重要性提高，區內數據中心自然需求上升。國際公司以往亞太區做採購，如今陸續發展區內市場。最近，BT贏得內衣品牌黛安芬全球合約。電訊公司嘅IT服務交付愈來愈緊要，最近請咗唔少PM，電訊公司一向福利甚佳，IT公司好難留得人住。

日本地震加上泰國水災，全球供應鍵大混亂。長遠嚟講，國際公司似乎就只有更依賴電訊商，隨時分散風險，做好災難管理。

每年，新加坡電訊都會舉行Singtel CIO Day，呢個高峰會每年吸引六百幾位IT高層，今年規模更大，SingTel國際企業嘅客仔好多，贊助嘅業務拍乸好多，電訊公司夠人數搞自己大型IT會議，證明生意規模拍得住大廠商。

接到 SingTel佢哋孖屐亭來電，來年CIO Day會三月廿八日假灣仔君悅舉行，今年請來名作家Jack Uldrich做演講嘉賓，呢位先生寫過幾本暢銷書，好有來頭，算係近期最有名氣嘅未來學家。不過歷史上，最有名未來學者要數八十年代Alvin Toffler，佢寫嘅「第三波」，唔少預測都今日睇返都幾貼切。

電訊公司一向都有請未來學家做顧問；另一位未來學家Ian Pearson，曾服務英國電訊二十幾年後，離開自立門戶，成立Futurizon顧問公司，佢對2030年嘅酒店服務，預測相當有創意。今次Jack Uldrich就會在Singtel CIO Day上，預測2020嘅ICT行業趨勢，相信有唔少人捧場。