VMWorld靠流動運算食糊

新一年，唔少廠商紛紛搞拍乸會議，介紹新一年重點產品。VMWare嘅重點係流動運算，下星期五大中華區老頂宋家瑜親自來港，推銷Horizon Suite。舊年VMWorld大會推出呢套用戶端產品，雖然初版，已相當矚目，支援不同平台虛擬應用，Horizon 以虛擬化交付應用，整合不同流動平台管理，迎接BYOD趨勢，亦有效保護公司IP。

但VDI始終係Citrix強項，要打開VDI市場唔易，Citrix亦推出支援多平台虛擬應用產品，VMWare唯有靠拍乸努力推銷，負責亞太同日本區終端用戶市場嘅Victor Thu孭重飛，呢位先生精通多國語文，近日頻頻出鏡。

講開VMWare，上星期先見Edward Yeung同單記老頂Michael Chue講合作，上星期有消息話Michael Chue離職。Michael Chue單記做足十年，愈做愈高，舊年睇埋MessageLab同台灣市場，銷售公認數一數二，本港唔少公共事業都係單記長期客仔。聽講Michael加入P仔解決方案部門，渠同唔少上市公司CIO極好關係，加上熟悉雲運算，肯定大有作為。

今年一月初，單記大中華請咗前咪記嘅連智浩出任主管，接替舊年離開嘅Andy Wu。Michael兩個月後就離任，時間好巧合。講番Michael，大家最熟悉渠，每次見面講跑步，即使今年「環島行」傷咗腳，渣打馬拉松依然照跑，毅力驚人，

講起單記，全球老頂Enrique Salem，舊年公佈業績盈利下跌一成後，馬上被撤換，壓力可想而知，目前單記CEO仍然懸空。

前國泰航空董事Quince Chong，過咗檔去中電做企業發展，昨日搵糖妹宣傳「綠適動生活」展覽。近年兩家電力公司，積極搞節能環保，除消費者教育，中電响綠色數據中心，亦做唔少工夫，今年外來投資數據中心仍然活躍，日後可能經常見到渠出嚟。