電子錢包

上星期，銀通向記者展示新武器，手機變身做流動錢包，銀通副總經理曾憲求展示插手機耳筒插口NFC裝置，似乎較獅子銀行iPhone孭龜殼略優勝，可兼容手機較多，但會唔會好易跌同損壞？較早前八達通張耀堂話，一定會參與電子銀包市場，加上兩大銀行研發信用卡手機錢包，愈來愈熱鬧。

目前講流動錢包，除咗附加裝置，Secure Element傾向選擇電訊商租用SIM卡位置，營運商有額外收入，肯定好高興，但香港營運商太多，行政好麻煩，八達通亦傾向SIM卡方案，聽講下年六月出籠，但iPhone仍無NFC，外置裝置可補充iPhone不足。八達通傾向支援NFC手機，咁想用流動八達通，就唔可用iPhone。

流動錢包市場持份者多；手機商、發卡機構、SIM卡生產商、銀行、商戶、電訊營運商、消費者、當然仲有IT公司。零售商亦用流動App推電子禮券，甚至用Paypal流動過數，Starbucks亦有自家電子咖啡卡。電子錢包持份者太多，成本點可具競爭力，好令人關注。IBM推Mobilefirst，介紹電子錢包有唔少案例；包括利用GPS訊息，即時推介優惠，亦可馬上儲起購物優惠，甚至做交叉推銷，銀行向商戶推更多服務，對銀行有唔少商機。

豬扒亞太區終於有新老頂，原Polycom亞太區老頂Hansjoerg Wagner接任高級 副總裁，坐鎮新加坡，其實呢個位懸空已久。豬扒全球老頂Kevin Johnson七月亦宣佈咗退休，CEO唔知要請幾耐。

另一方面，虛擬化流行，唔少公司冒起，除較早前以Datacenter-in-a-box嘅一鳴驚人嘅Nutanix。近期做虛擬化備份嘅Veeam亦好多人談論，產品速度快到嚇人，睇呢單記有排煩，呢兩家公司响VMware論壇上大出風頭，離上市日期應不遠矣。