OpenStack大會

近期銀行詐騙案極多，包括假冒私人匯款，銀行好頭痛，必須通過多種方法確認用戶身份，電話甚至SMS都可以被轉駁，騙徒可假冒事主身份，銀行正考慮多種手法確認事主身份，智能電話普遍，稍後可能連電郵認證都要用埋，減少假冒身份可能性。但電郵唔係人人有，咁無電郵係咪唔可以用銀行服務？

香港係國際銀行中心，但其實好多詐騙都係用低技術，如透過唔同方法套取個人資料，再用來假扮事主；例如有唔少騙徒假冒銀行推銷套取資料，搞到銀行登報澄清推廣來電號碼。遲早電話推銷愈來愈難，銀行亦要求IT部門更改認證程序，確保可以確認事主。

以香港舉行嘅技術會議，大多數消費性為主，純技術性嘅唔多。今年十一月五至八日，OpenStack選址本港舉行峰會，印象中係首個公開源碼大會在本港舉行。OpenStack响數據中心重要程度日高，預計參加人數唔少。OpenStack係雲運算中「基建即服務」重要公開源碼平台，預計會議好多人參加。

本港數據中心業務愈來愈多，唔少電訊商嘅公共雲，都以OpenStack為基礎。OpenStack公共雲市場雖有唔少捧場客；私有雲仍係VMware天下，不過OpenStack可配合VMware作混合雲，企業用戶應有興趣。月底VMware亦在北京搞vForum，應該亦相當熱鬧。

講起數據中心，華為剛獲合約，承建中信國際電信CPC鴨脷州數據中心，碰見高級副總裁Ivan，講起好少數據中心設港島，因為電費費，Ivan話港島數據中心始終有需求，因為電力公司唔同，可以作為備援，加上鴨脷州係集團物業，電費貴都無所謂。

講起OpenStack，開源成軟件潮流，對傳統公司衝擊好大。豬扒係SDN公開源碼計畫OpenDayLight最主要成員之一。上星期推出收購Contrail後推出開源嘅OpenContrail嘅SDN軟件，聽講日後會貢獻畀OpenDayLight平台，令更多用戶受惠，未來通過公開源碼推廣嘅軟件，愈來愈多。