香港密雲

OpenStack大會接近，唔少廠商高層來港。豬扒收購嘅開源 SDN廠OpenContrail高層亦訪港，先知數碼港已經用緊OpenFlow。OpenContrail支援OpenFlow，亦有虛擬路由器性能，同Brocade賣嘅Vyatta差唔多。

OpenContrail同埋Vyatta一樣，都可作為NFV（即係網絡功能虛擬化），畀服務供應商取代硬件，做增值服務，取代交換器以VLAN方式分隔，建立多租戶環境，亦支援MPLS標籤，提供IP層增值服務。vRouter係大生意，對雲運算環境好緊要，豬扒一向做開服務供應商，推NFV特別積極。

Brocade老頂Frankie話正在培訓新一代分銷商，因為Vyatta係軟件，銷售方式同賣鐵有分別。思科亦積極唱NFV，上月公剛新NCS產品系列，今期亦有報導，VMWare就公佈以Nicira為基礎嘅NSX。

上星期Rackspace推混合雲，另一家主要雲服務供應商AWS，亦响香港開始招聘高層，前咪記SQL產品經理亦過咗檔。OpenStack強調開放制式，但Amazon技術較為成熟，兩者各擅勝場。

美國經濟不振，繼思科及Alcatel裁員，其他相繼行動，豬扒公佈業績符合預期，亦裁二百八十人。美國復甦步伐唔明朗，AT&T放緩採購，政府陷入間隔停頓，豬扒股價受壓，從二十一蚊低走至十九蚊，投資者以為買蘋果Google合理啲，紛紛換馬。

科技公司靠哂海外市場，新上市嘅火眼Fireeye股價好硬淨，皆因海外市場做得唔錯，最近日本接咗政府五百萬美金訂單。火眼在市場上同另一家防火牆Palo Alto嘅Wildfire打到七彩，Wildfire亦針對APT，公開挑戰各大公司，如果願意試用Wildfire捉APT，即刻送出咖啡機一部，如果最後搵唔到APT，再送iPad一部，但聽講iPad好似暫時未送出過。

火眼亦有唔少本地合作伙伴，豬扒本身亦用火眼，聯同一齊入標。事實上防火牆正處於更替時候，豬扒保安話APT市場太細，渠哋集中做防火牆好過。