Veeam殺入大中華

上期講起Veeam，呢家公司增長比歷史上任何數據保護公司要快，呢家公司2008年創立，2009年已開始有盈利，舊年亞太區增長達三倍，香港更加有唔少人在評估，目前係單記最大勁敵。單記嘅Backup Exec一向係皇牌產品，如今遇上強敵。Veeam完全針對虛擬化，簡單易用，加上價格唔貴，已經有口皆碑。

問起行家，原來以前HDS嘅Tina Tong過檔Veeam，負責做拍乸，但亦包埋見客，而且負責GC，飛來飛去，全區只有渠同埋一位SE。不過Veeam已經有唔少捧場客，剛出7.0版本，功能更強，本報亦正在考慮。Tina話香港主要靠蛇仔做分銷商，全球有三個支援中心，其中一個响俄羅斯，因為創辦人其中之一位係俄裔。

下個月OpenStack峰會，細節還未公佈，各家已密密凖備，OpenStack用戶主要係電訊商同服務供應商，但唔少企業IT主管愈嚟愈有興趣，今次贊助廠商唔少，大批專家到港，即使同 EMC及VMware推出vBlock嘅思科，亦係OpenStack支持者，原因係VMware嘅軟件定義網絡（SDN），與思科有直接競爭。

Brocade嘅老頂Franklin Sze，亦話渠地有贊助OpenStack，提起咪記前老頂PY，原來係去咗跟大中華前老頂Simon Leung，去咗哈羅公學做 COO，PY前愛將Zoe响Pearson搞電子書，咁多IT人去咗辦學，證明呢行前景唔錯，書中自有黃金屋。