2014年7月16日星期三

TDC研究報告


近年貿易發展局TDC積極發表經濟報告,研究總監係前渣打銀行經濟學家關家明。以前响渣打聽關先生講金融大勢,深入淺出。不過TDC研究就唔再集中講經濟機遇,發來有關TDC研究報告,三篇推荐報告,竟然都同IT有關。

首篇研究講台灣屈臣氏網購平台上線,成台灣第一家自行建構電子商務平台藥妝通路商。台灣屈臣氏有四百七十一家舖,舊年同Yahoo!合作後發現網購大有可為,自立門戶。香港舖租比台灣仲貴,網購是否更大有可為?其實淘寶老早有香港藥妝網購,代購屈臣氏指定化籹品或萬寧某隻洗頭水;包送貨仲有折扣,不過對象似乎唔係本地居民。上淘寶網,可知邊隻化妝品大陸最流行,又有詳細產品介紹加埋用法說明,香港品牌做孖屐亭,絕不可錯過淘寶。

第二篇係TDC研究部編輯Tony Murray,訪問LinkedIn人才解決方案部香港主管Eric Yee,講點用LinkedIn打造人才品牌,解決招聘難題。其中包括LinkedIn為Walmart六個禮拜內在本港招聘全部高層管理。據講LinkedIn香港有成六十至一百萬會員,不過政府公佈推算全港勞動人口,只有三百五十萬。Eric Yee話LinkedIn內地亦有五百萬會員,亦有提供顧問服務,進軍內地市場。

另一篇趨勢報告係特約記者Anna Huddleston從賭城,報導美國全國廣播業協會展覽 (The National Association of Broadcasters),話美國舊年兩百萬觀眾,取消有線電視服務,改睇衛星或網上平台。本港早興平板煲劇,加上乜盒物盒,大陸又OTT當道,有線電視早半條人命,聽聞Now亦有意變身
OTT。舊年聽聞Wiki王亦有份參加,今年如果再去嘅話,唔知仲有無興趣再搞免費電視。



沒有留言:

發佈留言