太古一期Brocade進駐

上期話太古東區係IT集中地，網絡設備商Brocade亦响太古坊宏德大廈，樓下就係Verizon。Brocade港台老頂Franklin Sze話地方唔夠用，五月搬去太古城第一期廿三樓，樓上係競爭對手豬扒，樓下就係HP。Franklin話新辦公室增加PoC實驗室，方便客仔概念驗證。近來Brocade頻頻出擊，除咗收購Riverbed嘅Stringray（SteepApp），上星期再收購Connectem。

Brocade積極發展SDN及NFV技術，收購Connectem，有望幫助流動營運商利用NFV，毋須利用特定設備，可用虛擬化技術及X86平台，大幅降低EPC成本，提高資源使用率及網絡可靠性。Connectem主攻流動營運商LTE網絡虛擬化Evolved Packet Core（vEPC），舊年豬扒EPC產品MobileNext以失敗告終，之後夥拍諾基亞開發vEPC，其他vEPC對手包括愛立信、華為、Alcatel-Lucent等大廠。華為已為中國移動推出vEPC，又剛同NTT DOCOMO完成PoC，同P仔關係密切計畫測試vEPC，佔有率緊跟老大哥愛立信之後。

以往業務相同廠商，好少搬埋同一幢大廈，除咗怕洩露商機（例如畀人遇見某位客戶到訪），甚至有機會被撬走員工（搭𨋢時唔覺意過咗電）。以往租戶比較有話事權，甚至要求業主不可租畀競爭對手。今時今日，可以話係業主市場，百無禁忌。太古城第一期樓下Pacific Coffee已係蛇竇，加上Brocade進駐，日後更加熱鬧。

上期講開HP收購Aruba，辦公室位於銅鑼灣，收購完成可能搬返太古城。傳聞HP亦有意出售H3C華三股份，收售之後Aruba同華三合併機會不大，兩家公司亦係競爭對手，華三本身亦有無線網絡技術，同HP合併後幾乎無經太大整合，分手亦比較簡單。華三响本港公共政府部門、鐵路、SP等都有唔錯表現。但論無線網絡技術，Aruba遠遠領先，可惜本地太依靠單一銷售渠道，日後HP推，情況可能有大改善。