IT行業新常態

唔少IT老頂，都嘆壓力好大，每季市場翻天覆地。近年一直係本地大戶嘅澳門賭業股，近月需求急跌，據報跌幅近一半。去年底， 澳門賭業初現頹勢，今年初更大幅下跌，有IT廠商話訂單下跌超過四成，本港零售業亦受內地旅客需求減少收縮，屋漏偏逢連夜雨，今年唔到數可能係變成新常態。

專門做商業分析及商業智能嘅SAS春茗，竟然見到O記老頂Wilson Ho，原來加入咗做SAS香港澳門總經理。SAS 規模較O記細好多，本港辦公室只有四十幾人，亦支援南中國業務。

中國兩會李克強總理話，新常態以下，中國經濟下行壓力「還在加大」；減息陸續有來，人民幣面對強美元，下行壓力唔細。中國企業向外採購設備，亦受到匯價影響，生意亦唔易做。舊年SAS仍有雙位數字增長，又宣佈同Radica合作，結合大數據，推出客戶關係管理分析方案。目前唔少客戶，同時利用WeChat、電郵、SMS溝通，呢啲對話可以結合起嚟，微調向客戶銷售方式。以往電郵攻勢，一味漁翁撒網；利用SAS分析平台，根據客戶從不同平台對話，進行一對一嘅個性化銷售唔少電郵攻勢反應非常低，原因係內容劃一單調，效果奇差。Radica一向有個性化電郵方案，SAS可從數據分辨客戶個人喜好，提高反應，效果立竿見影，相信唔少市務人員有興趣。Wilson話，SAS與客戶傾，從POC到落實，銷售周期一般要半年，但客戶見到實際效果，成功機會亦較大，雙方合作亦較為長線。

F5就委任前西門子企業通訊大中華區老頂Jerry Huang出任大中華老總，呢位黃先生會駐上海，直接向Emmanuel Bonnassie負責。呢位Bonnassie先生係法國人，舊年調任F5亞太區，馬上作出改組香港，相當進取，真正係新官上任三把火。