Coaching與mentoring

上星期遇見前大地瓜老頂Francis Pang，雖然Francis從大地瓜退休，原來仲忙過從前。唔少公司紛紛請Francis出山，渠而家為一家流動應用公司Movius兼職打理大中華區業務。Movius可以幫唔少大企業管理BYOD，呢個方案大有前途。

Francis又正在港大Space讀碩士，內容係Coaching and mentoring。聽落兩個名詞內容差唔多，原來解釋好唔同。Francis正為大機構部分升上高層同事提供mentoring，分享個人經驗，果然學以致用。新進高層得渠指點，相信受益匪淺。

Francis出名勤力，養生亦有一套，除咗每星期打高爾夫球，每日行唔少路，加上朋友滿天下，幾乎日日有聚會，生活平衡之餘，身體更勝從前。

IT係高壓力行業，難得Francis舉重若輕。但係唔係個個捱得，數月前在美國見SAP老頂Bill McDermott，呢位超級CEO曾歷任Xerox高層，又做過Gartner及Siebel，最後加入SAP，但七月份從德國返美國探親時，朋友家中夜晚跌到，幾乎無命，雖然終於被人救番，但一眼失明。舊年McDermott出版自傳「Winners Dream」，見渠面時獲贈一本，書中自述入蘭克施樂，紐約市銷售影印機；待人接物，鼓勵下屬，刺激士氣之道，令人拍案叫絕，想唔到突然有血光之災。本來McDermott計畫九月份到中國見領導人，SAP同中國在工業4.0有唔少合作，今次可能要等渠養好傷，先至可以再到北京。