手機大戰

今期公布嘅編輯之選，其中三項都同流動通訊有關。而今個星期，亦有單新聞，話Symbian終於變成開放系統，一於同Google嘅Android鍊過。

其實，以智能手機平台，Symbian似然仲係一哥。不過，聽開發手機嘅專家話，Linux平台來勢汹汹，但以智能手機平台嘅講，其實iPhone潛力仲大，以應用嘅速度，更加冠絕同儕，用嚟開發遊戲，更加一流。

以硬件同靚仔程度，當然嘅iPhone（除咗好似話比較唔捻撞之外）。但長遠嚟講，手機平台嘅應用，可能係大家買手機考慮首選，大家以Windows為鑑就知道嘞。

iPhone仍未支援Push Mail，企業應用上可能仲有啲缺陷，但消費市場可能引起震撼可能唔少，最重要係支援開發人員嘅SDK做得唔錯。iPhone遊戲網上四圍都有，而家地鐵內，唔係玩PSP係玩iPhone。iPhone有個遊戲就係用iPhone感應直橫位置嘅能力，控制個波仔移動，相當搞鬼。

原來，N95好似iPhone咁，有感應手機直橫位置嘅能力（Accelerometer），結果有人開發咗一個叫Rotateme嘅程式，當手機轉動時，N95畫面隨之轉動，Youtube有唔少片段介紹過。

可惜係程式上載後，原來Symbian程式都要簽署，搞到安裝好麻煩，網上N95手機用戶罵聲四起。唉！Symbian做慣手機系統，睇嚟仲未清楚開放系統係乜。