電腦睇高清

咪記終於公佈標基將在八月十二日到香港發表專題演說，主要係到香港慶祝咪記亞洲研究院嘅十周年紀念，並主持創意論壇，介紹咪記點推動創意，跟住應該就去北京睇奧運。

講起創意，其實本地同大陸，亦唔少人材。好似以前一手搞起電子剪報慧科新聞網嘅Ringo Lam，之後去咗北京搞起一個分享視訊嘅魔廚網，最近又搞咗一個叫傲視網絡（Orbit Networks）嘅新公司。呢個公司主要集中在網上，提供加速傳送視訊嘅技術。

雖然話互聯網速度快咗好多，但要播高清仲係有啲距離。原來國內清華大學有位楊士強教授研究視訊分享技術，發明一種專利技術Anyplex，可以利用P2P方式，在網上分發高清視訊，節省網上頻寬多達七成！

Orbit已經引起本港好多電視台興趣，目前香港電台同埋鳳凰衛視做拍乸，今個星期亦會有另一家大型電視台加入，好有氣勢。聽一啲又做報紙又做網上電視台嘅行家，去睇完示範，話高清到飛起，唔怪得電視台紛紛落搭。唔駛幾耐，外國就可以在網上享受本港高清節目，唔駛經分銷頻道咯!

Ringo在大學做研究論文，亦係集中做視訊研究，而家可以話學似致用，佢話十幾年前响紙上講嘅理論，逐件逐件變咗現實，真係幾有趣。