HP同O記交換人質

上星期講開咪記Stephen Elop過檔去諾記，聽咪記中人話，呢位IW（Information Worker是也）部門老頂，做Office示範出神入化，係不可多得嘅行政人員。而HP委任猶太裔德國人Leo Apotheker接替Mark哥留下嘅空缺。Apotheker响SAP做咗二十年，講流利德、英、法、荷蘭、希伯來文，原本接任SAP老頂，但高處不勝寒，一年後被炒，接班人真係唔易做。

 HP亦請咗O記舊總裁，盛傳俾拉利先生趕走嘅Ray Lane，作為非執行主席。O記請咗Mark哥，而HP就請番死對頭SAP舊老頂Apotheker同埋O記舊馬，意思明顯不過，就係針對O記。拉利先生公開批評HP炒Mark哥戇居到極，反映一種美國文化。美國人奉行英雄主義，拉利先生崇拜Iron  Man，作風夠高調，噏得就噏，又好管閒事，做正義朋友之餘，自己仲請埋Mark哥。

HP搵歐洲行政人員任老頂，始終兵行險著，聽聞呢位Apotheker先生人脈廣泛，尤其同高層打交道好有一手，市場就對任命好有保留，至少股價就無乜反應。HP始終以IT基建為主，性質上同I記同思科似啲，以O記作為假想敵，好似有啲離題。

HP在Mark哥麾下，收購唔少業務，點樣消化真係難講。據聞H3C維持現況，反正大家都H字堆，佢哋仲可以賣埋HP Procurve，H3C正更新廣告形象，睇呢唔會好似EDS咁，完全併入HP。究竟HP收購咁多公司，有乜雄圖大計，真係耐人尋味。

另一家上新聞嘅公司叫雅虎，上星期又三名高層棄巢，股價一路向下，離咪記當年收購嘅33蚊美金愈來愈遠，股東媽聲四起。不過香港雅虎做得唔錯，至少有手寫中文輸入，解決唔少公共電腦上搜尋嘅麻煩。