Phone 7的合縱連橫

美國第二期量化寬鬆，IT收購傳聞亦愈傳愈多。《紐約時報》有文章話咪記可能買起Adobe，最新傳聞又話Google亦有興趣，Adobe即刻谷底回升。最新講法係Phone 7會深入支援Flash 10.1，而Steve Ballmer甚至去咗Adobe總部，大家一齊密斟。

iOS唔支援Flash，所以視訊網站，除非改用H.264，否則iOS上（包括iPad）都享受唔到視訊。不過蘋果已經成為宗教，所以用戶唔覺有問題。Phone 7大力支援Flash，唔知會唔會啲火花。

Phone 7响嘅評價，暫時都唔錯，不過介面基本上好似一個唔整齊嘅iPhone。不過Phone 7支援Xbox Live Service，隨街可以打機，加埋Zune多媒體，基本上已經愈來愈唔係一部手機，但咪記反撲歸真，今次自稱為一部電話，真係好諷刺。

Phone 7對於 Ballmer嚟講意義重大，Mobile部門可以話係雞肋一塊，佢舊年初將 Windows Mobile徹底改組（即係炒哂），可以講係完全重新再出發。如果依然唔扭轉唔到局面，咪記仲會唔會投資在智能手機，真係好難講。

二OO四年，負責中國研發嘅張亞勤曾經去美國，為Ballmer執掌過手機業務。曾幾何時，Windows Mobile竟佔咗智能手機市場四分一市場。張亞勤去美國，原來係Ballmer某一次去中國見中國領導人，兩人等緊嘅時候講起，Ballmer話Mobile部門虧蝕到佢肉痛，請張亞勤去美國整頓，張亞勤公開話，當時Windows Mobile只有Windows 3.0嘅水平。

呢位中國神童，有一次嚟香港傳媒茶聚。席間有人問佢， Mobile部門出咗乜野問題。佢只答一個字─「Arrogance」（傲慢），原來咪記將手機PC咁做，寫完之後就俾手機生產商（同埋同戶）解決問題，結果怨聲載道，佢話Coding水平，有時只係問題表徵，背後係企業文化。作為咪記高層，講話咁直接，在場者都有啲愕然。不過，中國人話驕兵必敗，大概都係咁意思。Ballmer會唔會戰鼓思良將，就唔知嘞。