2011年4月13日星期三

思科推傻瓜攝錄機

科技公司現金太多,出路只有不斷收購。不過部分收購,可能好無厘頭,例子之一係思科O九年,用五億九千萬美元,收購一家好細嘅消費電子公司Pure Digital,呢家公司生產低檔高清攝錄機Flip(傻瓜攝錄機),但係思科一直都唔識點賣,消費部門輾轉由接手,試過請商業夥伴推銷,送出唔少俾客用,結果無疾而終,。

舊年Pure Digital創辦人Jonathan Kaplan都走埋,唔少投資者以為思科今次收購,無經深思熟慮,幾年嚟仍無乜起色。不過最近Flip MinoHD贏咗德國工業設計著名嘅紅點(red dot awards)大獎,算係有啲交待。

今個星期思科嘅消費產品部話,Flip會在百老匯、豐澤同埋衛訊有售,可錄一小時高清影片嘅Flip MinoHD,盛惠一千四百五十元。

印象中思科嘅消費部門,主要產品只係Linksys無線上網AP。但究竟乜人會買思科傻瓜錄影機,賣點之一原來係可上載到flipshare.com網站,方便同朋友分享影片。不過flipshare都有限制,只能上載99套影片或者半小時高清影片,可俾指定聯絡人或者群組,線上一齊分享影片,而上載影片到Youtube、Facebook同埋Twitter都好方便。但高級電子消費始終一向係日韓天下,大家已經習慣用手機拍影片,以4G上載分享。唔打得電話,唔能夠上網嘅Flip,唔知有冇法寶,可以殺出重圍。

上星期去Pacnet,原來佢哋正將九龍灣其士中心後勤基地,集中搬去太古城總部。通常辦公室愈搬租金愈平,Pacnet反其道而行。舊年市況唔好,Pacnet暫時中止申請在Nasdaq上市,今年底捲土重來,集資額約五億美元。佢哋連接紐澳同美洲嘅海底光纖應該响二O一三年竣工,前景唔錯。不過今月初日本地震,Pacnet日本嘅海底電纜受損,但福島核子泄漏,派唔到船去維修。

沒有留言:

發佈留言