再論思科

上星期講思科，話買Flip係錯誤，路人皆見，可惜管理層唔信。結果行政總裁John Chamber出封信俾全思科，表示思科面對投資者，思科出現誠信問題（Creditability problem），封信表面受眾係員工，其實係向股東懺悔，除咗Flip以外，亦買咗唔少無謂嘢，難以落台。

思科雄霸網絡市場多年，包括路由器、交換器、網絡基建，近年進軍五大領域，其中當然包括視訊，可能現金太多，又想向股東交待，不斷收購，忽略業務重心。一年之間，股價由近三十蚊反覆下挫，近期只剩返十六蚊。豬扒就由二十幾蚊升上四十蚊。技術大家可能唔識，股價就反映一切。

但係，其他集中精力網絡公司表現亦好；明星股好似有Riverbed、 F5、Radware，股價全以倍上升，尤其係Riverbed同F5嘅技術，更加應該係思科嘅重頭戲，亦係雲運算核心；如今只有思科斯人獨憔悴。Riverbed同埋F5亦相繼進入雲端儲存技術市場，Radware近期亦好積極；投資者唔嬲就假。

不過，思科仲有一家低調對手叫華為，二Ｏ一Ｏ年華為銷售收入意然達二百七十三億六千萬美金，營業額竟然同瑞典老牌愛立信看齊，思科則剛剛先越過四百億美元大關。華為嘅國外銷售額，竟然兩倍於國內。以銷售額計，中興同埋華為兩家，都可以講真正係「走出去」嘅中國企業。華為手頭上彈葯充足，收購就挫折重重。舊年收購摩記無線設備，今年想買3Leaf都未竟全功，原因係美國國會以為會影響國家利益。傳聞軍人總裁任正非身體唔好，子女陸續入局，華為上市又未有期，前景不明朗因素，想起嚟比思科仲多。