下一代iPad新App

接到蘋果公關Teresa電郵，話蘋果全球開發者大會 (WWDC)定次六月六日响三藩市舉行，傳聞話會公佈iOS 5.0同埋新OSX作業系統獅子，甚至話推出iPhone 5，蘋果公關一貫守口如瓶。只有一樣肯定，新iOS依然唔支援Flash。不過美國搞笑媒體Onion就公佈用咗HTML5推出iPad App，仲上埋紐約時報科技版，真係威水。

Onion嘅新聞大部分老作亂嗡，諷刺時弊，只求得啖笑，所以唔駛乜記者。呢張報紙曾經被外國傳媒多次翻譯引用，當成係真新聞（包括北京晚報），鬧出國際大笑話。不過有一樣係真嘅，就係Onion有成二百五十年歷史，由一位德國移民所創辦。

不過iPhone上App日日新鮮，港燈有環保App、九巴有搭車App、電召「的士go」，九倉有打電話App，聽聞又寫緊俾推銷員見客嘅App，細摩JP又推「J.P. Morgan FundWatch」。識寫iOS嘅App朋友有排做。

當然，有關Flash同HTML5孰優孰劣，可能仲有排拗，Adobe同蘋果關係，可能仲差過咪記。Adobe推出從Flash至HTML5嘅工具，但效果一般。上星期另一則令人震撼新聞，係Adobe响美國奧蘭多舉行Photoshop World示範新嘅Photoshop iPad App，呢個示範之強勁，大家驚呼為新一代killer App，睇完大家有買個iPad嘅衝動。結果完全出乎出乎Adobe嘅意料外。產品總監Maria Yap澄清呢個暫時只係概念產品。從現場示範，除了段片係用Premiere做出嚟，呢個概念睇嚟都好認真。

另一邊廂，Google嘅手機Nexus就夥拍Mastercard同花旗响美國推出類似手機八達通嘅支付卡，初步同Wal Mart等連鎖集團合作，以八達通响香港發行量（據講發行量已突破二千萬張，每人三張），怕真係好難响香港有立錐之地。