Ｉ記百年老店

上星期I記慶祝成立一百周紀念，新老頂Tony Lai亦亮相與傳媒及分析人員面見，贈送I記一本專著Making the World Work Better，介紹百年以來公司成長歴程。

一九一一年，I記由三家美國公司合併而成，當時叫CTR（Computing-Tabulating-Recording），美國金融界奇才Charles Flint促成。一九一四年， Flint從NCR聘請一 位銷售經理Thomas Watson過檔做總經理。大家都知道Watson博士就係I記開山祖師爺，十年後I記嘅每年營銷已翻咗十三倍，Watson亦進軍海外，並且改名做 IBM，中譯「國際商業機器」，IBM終於成全球最著名嘅品牌之一。

原來IBM嘅企業口號「Think」亦係出自Watson博士之手，提醒同事不斷思考，唔好墨守成規。一九四四年Watson在哥倫比亞大學，成立科學計算研究實驗室，奠定I記實驗室嘅科研基礎，日後佢哋納米技術以及高溫超導體，贏得多次諾貝爾獎項。

後來I記手提電腦亦叫ThinkPad，原來個人電腦出現前，I記嘅隨身記事本已經叫ThinkPad，果然係神來之筆。

I記嘅發明，唔少集中電腦，二O年代發明 Punched Card，呢種技術用於儲存、輸入資料，超過四十年，至八十年代仍然存在，硬盤及記憶體方面亦有唔少貢獻。一九五四年發明嘅Fortran語言，係第一種供電腦科學以外人士使用嘅編程語言，日前仍廣泛應用。

七十年代發明UPC條碼，掀起零售業革命。一九八O年I記科學家亦發現準份子鐳射可用於手術用途，奠定激光矯視手術基礎。

一九五七年，I記成立香港辦事處，主要賣辦公室文儀產品，至一九六一年開始銷售IT產品。一家企業一百年歷久不衰，以IT行業競爭激烈，更難能可貴，不負老祖宗遺訓。