2011年6月8日星期三

Polycom漁人得利

早幾年,HP發展Halo網真產品,結果亦係賣盤收場,以八千九百萬美元出售咗俾Polycom,可謂蝕讓,雙方建立策略性夥伴聯盟。HP買咗3Com後,即刻喪失思科拍乸地位後,即刻埋堆咪記嘅(Lync即係OCS)同Polycom。

雖然話思科嘅UC仍係主流,但咪記Lync增長亦好強勁。反觀咪記發展 OCS後,思科嘅Call Manager即刻唔用Windows伺服系統,改用RedHat,如今思科掃走埋HP。大家無哂朋友之後,Polycom即刻好受歡迎,如今再獲HP撐腰,無端端發達。

Polycom做話音起家,處理聲音(主要係模擬技術,佢哋Soundstation幾乎會議室必備)非常清晰,舊年最大對手Tandberg被思科收購,LifeSize亦被買起後,Polycom成為唯一專心做UC嘅廠商,產品亦好受一眾VoIP玩家歡迎,唔少人安裝Trixbox都喜歡用 Polycom電話機頭,亦係產品線最齊嘅UC廠商之一。

今個星期Polycom組成開放視像通訊聯絡 (OVCC),成員包括主要電訊商,包括PCCW Global,話可以令視像會議好似打電話咁方便。目前Polycom已經佔四成視像會議市場,咪記收購Skype,Polycom同咪記有策略性關係,支援 Skype視像會議,絕對係得益者之一,Polycom股價上番近六十蚊高位,值搏率上升。

那邊廂,思科最大對手豬扒股價發瘟,原因係大老細 Kevin Johnson响技術會議上突然講,盈利受政府縮減開支及日本地震打擊,股價當堂跌一成,之後一直响三十三蚊美金徘徊。

上期講到Stanley Chung加盟 Westcon,原來佢未必分銷做思科產品。但「蛇仔」俾「佐屎」食咗,好多思科拍乸,希望香港有多間思科分銷商。市場傳聞Westcon曾經洽購多家分銷商不果,要本港另起爐灶。Westcon嘅焦點可能係比較專門產品,好似Splunk之類,同HP ArcSight同單記SIM鍊過。

Mtech可能有以前P仔舊人上位,最近Mtech人事變動頻頻,可見保安產品唔容易。Stanley响Mtech曾幫Palo Alto打入本地市場,聽講最近Palo Alto仲贏咗大刁,撬走Checkpoint大客仔孖窿。不過自BlueCoat舊人PK Lim離開後,Palo Alto又變咗F5舊人大本營,真係變幻原是永恆。

沒有留言:

發佈留言