I記一世紀

今個星期相當繁忙，因為除咗零售博覽，又有豬扒嘅技術大會，而I記聽日又話慶祝一百周年。O記就去北京搞「踢脫」大會，聽講有唔少人事變動。

今年係辛亥革命一百周年，本港有唔少紀念活動。原來I記亦係當年開檔，一九一一年六月十六日成立，即係話明日就慶祝成立一世紀，真係要恭喜一下。雖然美國經濟麻麻地，但I記海外收入強勁，軟件收入又一直急升，股價表現理想。I記業務多次轉型後，最近市值仲竟然十五年來首度重越咪記，果然犀利。

I記香港新老頂戴澤棠亦會會見傳媒，講吓I記未來展望。Tony Tai今次係第二次出任香港老總，佢係七七年嘅港大產品，今次可以番嚟順便慶祝埋母校一百周年校慶。

零售博覽就有多項IT產品，包括咗早一陣宣傳好勁嘅咪記Surface，用嚟响卡拉OK房間使用，而代理嘅NCR老頂Keith Au仲同Red MR才女老闆娘Canny Leung仲一齊上台介紹，講吓轉變科技點樣迎合轉變嘅消費者。

Surface係咪記研究所開發嘅多點觸控技術，面世咗至少五六年，香港就由 NCR同DesignerCity一同設計應用同推銷，除咗用嚟放响K房，亦應用在最近愛因斯坦展覽，流行程度始終有限。一項科技經過幾年依然唔能夠全面商業化，唔怪得咪記嘅股價會跑輸。