Aruba高層Dominic Orr來港

上星期講起河床業績有唔錯表現，跟住就有收購消息。今次繼續收購網絡監察工具OPNET。OPNET响電訊商有啲名氣，但係一般企業市場就較少人知。過去幾年Riverbed都有收購，舊年收咗Zeus同Aptimize都較細，前年收CACE。但今次收購價總值十億美金，收購後河床股價急跌，唔知市場認為價錢太高，還是對增長前景懷疑？

河床除咗招牌產品Steelhead，亦有Cascade用嚟作網絡性能分析，又有出 Stingray等ADC產品。驟眼各不相干，其實針對未來所謂「Software defined datacenter」。河床產品支援虛擬化，未來數據中心全面虛擬化後，肯定有好高市場價值。

不論收購價是否過高，不過河床策略清晰，OPNET會整合入Cascade；總好過思科買咗Flip視像玩具，過兩年又摺埋。下星期Cascade高層來港，加埋開發Wireshark嘅Gerald Combs來港，聽講報名人數好踴躍，香港有唔少Wireshark用戶，到時會解釋OPNET點幫到手。

講起高層訪港，聽講Aruba Networks嘅CEO，Dominic Orr柯萬柯，下月初亦來港。呢位柯先生係美國矽谷傳奇人物，澳門出生，講流行粤國語，後來去咗美國讀書，Caltech取得博士學位，曾出任HP高層，嚟香港同日本HP任職，又曾經帶幾家高科技公司上市，見證科網泡沫驚濤駭浪，後來去咗西非做慈善工作。2006年，Aruba董事會幾經辛苦，請柯先生出山帶領咗Aruba上市。近幾年，Aruba作為小型WiFi無線廠 商，竟然經常砌低思科同摩記，本港贏唔少大破席，上季計嘅全年營業額，突破五億美金；一般嚟講，營業額超過呢個數，科技公司就較難被收購。呢位柯先生來港，亦安排同本港金融界CIO見面，政府有心搞科技局，特首應該同呢位柯先生見吓面。