後PC時代來臨

市場盛傳Windows 8反應一般，廠商業績股價紛紛受拖累，股價受壓。智能電話銷情持續上升，ARM晶片設計商高通（Qualcomm），十一月公佈第四季盈利，竟上升達二成，股價持續向上。今個月初，Qualcomm市值首次超越英特爾，兩者市值其後愈拉愈開，預示個人電腦日益被流動設備取代，後PC時代終於來臨。

台灣宏達電（HTC）同蘋果和解，新機反應不俗，帶動台股升勢，整個HTC供應鍵股價向上。HTC响日本同KDDI，合作推出日式風格手機HTC J蝴蝶機，受市場好評。蝴蝶機即將登陸台灣，香港亦有衍生機種推出，亦為美國Verizon推出HTC Droid DNA。高檔手機生產商就好似時裝咁，產品一流行，隨時升到唔信。高檔智能手機唔係吹台風就係韓風，其他地區廠商似乎只能鬥平價。

但另一家以H字頭嘅公司股價表現就麻麻地。科技巨人HP公佈季度業績，因收購Autonomy作大額撥備，又傳出賬目做假，當日Due Diligence可算糊塗 ，HP收購接二連三錯誤，後果陸續浮現。另一家收購成績麻麻嘅公司叫做思科，上星期以十二億美元收購Meraki，係一星期內第二宗收購。Meraki主要技術，係將WiFi控制器放上雲端，以租用方式提供控制AP，Aruba亦老早擁有同樣技術。Meraki規模好細，客戶又唔算多，香港好似由DataAssure做緊代理，究竟值唔值十二億？不過相較於以前以五億收購Flip，呢個價錢可能唔算太過。

此外，Dell亦宣佈收購Gale Technologies，呢家公司專門做自動化雲平台軟件，支援思科UCS同EMC虛擬化平台，如今Dell被買咗，其他平台會唔會繼續發展？Dell近期收購，最成功算係Force10，咗10Gb平台搶唔少生意，亦係最早推出40Gb廠商。 本星期Dell响北京舉行戴爾中國高峰論壇，應該再有新產品公佈。