2013年6月12日星期三

Windows 8.11?

踏進六月,入咗夏季,唔少行政人員會陸續去抖暑前,會議愈來愈頻密,今個月廿七號星期四,豬扒假金鐘港麗酒店搞年度Juniper Solutions Day。講起豬扒,自從五月份,思科股份反彈,豬扒亦隨之向上。雖然兩家公司係競爭對手,股價經常拍拖上落。

思科反彈,顯示美國經濟逐步回升,訂單增加,所以受到追捧,春江水暖。雖然話上月底思科有回吐,股價仍接近全年高位,業績應該有改善。

上星期台北Computex,最矚目唔係硬件。咪記宣佈,本月廿六日正式推出Windows 8.1,最大突破係開始鍵重現眼前,大家可亦毋須一定登入Metro介面,直接進入桌面,唔少用戶仍然用Windows作為桌面電腦打字,Metro介面唔係好方便。Windows 8極速推8.1版,可以話係第二波產品發佈救亡,唔知仲有無8.11版本?

印象中Windows 3.0版本後出3.1,奠定Windows江湖地位,之後NT亦曾出過3.1版,Windows for workgroup亦出過3.11,NT又出過4.0版本,之後改過唔少奇怪嘅Windows名稱,但Vista短命(唔通推Vista 2.0咩?),就馬上推Windows 7,終於決定改番以編號做版本名稱,原來有呢個好處。

RT版本就有Office隨機附送。咪記走向雲端,亦推針對消費市場嘅Office 365 Home Premium,每位用戶可安裝Office在五部電腦(包括PC及Mac),20GB嘅Skydrive儲存,每月六十分鐘Skype電話,只獨缺電郵戶口,每年盛惠八百蚊,單係安裝五部電腦,已經抵到爛。

較早前,咪記大中華區老頂Ralph Haupter接受訪問話,短期內會响香港開專賣店,抗衡蘋果零售市場影響力。今年較早前,咪記已在阿里巴巴屬下,以前叫淘寶商城嘅「天貓」開檔。港舖租貴到離譜,蘋果有果粉,不過咪記亦有Xbox,大概可吸引到機民。

沒有留言:

發佈留言