掃毒難做

新年前好多人轉工，咪記資深乾收銀Gareth Chan亦去咗Splunk。Splunk上市一年升咗四倍，成為矽谷神話，不斷請人。

口痕友話矽谷愈難解釋嘅科技升得愈高，好多人唔知Splunk做乜，好多以為係SIEM，因為唔少設備製造商，都係用Splunk，包括豬扒同Citrix，都用Splunk監察設備。Splunk應用廣泛，唔少設備公司選擇同Splunk一齊做宣傳，因為幾乎可夾任何設備。

其實Splunk亦可做唔少大數據同BI，唔需用關聯數據庫，起貨快趣，所以唔少人樂於試用。Gareth話，用Splunk唔少BI幾個星期就可開始交貨，陸續多人認識。

思科買咗SourceFire之後，終於搞宣傳，包括首輪電影「掃毒」，呢套戲近期好熱，電影賣座，但真係掃毒難做過戲。SourceFire主要做IPS，今年較早前思科用27億美金收購， NSS Lab公佈，SourceFire係速度最快最準確嘅IPS，但係Palo Alto第二代防火牆深入民心，唔知SourceFire仲有無位走。近期思科公佈新興市場業績大幅倒退，俄羅斯上季銷量急跌，業績前景唔明朗。其中有講法話，美國國家安全局（NSA）利用思科網絡器材監視，導致發展中國家，包括巴西中國等，採購器材趨向審慎，思科股價有壓力，保安產品更難做。

真正掃毒亦好難做，廠商競爭大，終端掃毒軟件迅速跌價，賣咖啡同單記終端掃毒產品，唔少年費跌破一美金，非常艱難。