流動電視暗渡陳倉

上星期新聞多多，最出人意表當然係Wiki王，收購中移動流動電視頻譜，轉做流動電視。流動電視利用UTF黃金頻譜，係真正廣播。

唔係Wiki王收購，好多人唔知香港原來有流動電視服務。幾年前，流動電視曾有兩大技術陣營，分別係DVB-H同埋MediaFLO制式。據以前DVB-H 和 MediaFLO 技術測試，上述兩個英美制式已玩完，原因係不成熟，耗電高轉台慢。中移動用緊CMMB，畫質更加麻麻。歐洲嘅新一代地面數碼廣播DVB-T2，已包括新一代手持設備數碼廣播制式DVB-NGH。但支援DVB-NGH設備，2015年先至出現。

當年發牌，電訊管理局採技術中立原則，理論上Wiki王可採用唔同制式；不過目前支援流動廣播手機數量有限，加上流動裝置介面隻隻唔同，好難支援唔同嘅外部裝置。流動電視只針對流動設備，一定死梗。猜想Wiki王想用流動電視制式，變身入屋免費電視。

流動電視制式其實唔關鍵，用外部裝置接收大氣電波訊號，解碼制式唔難解決，手機及平板處理器速度愈嚟愈勁，就可通過軟件解壓，還原高清影像。一般家庭唔識高科技，入屋有難度。Wiki王可能搵人生產Set Top Box，經HDMI介面，甚至Miracast投射到大電視。ARM處理器價格愈來愈低，推出接收解壓器，可出售畀一般家庭。現今電視有幾個HDMI介面，接入問題唔大。點確保訊號穩定？真係一大疑問。流動電視唔可經公共天線駁入，極可能影響質素。