700MHz頻段有望提早釋出

亞視不獲續牌，UTF頻譜分配，引來不少臆想，議員多番追問。較早前獲免費電視牌照兩家公司，首先獲發牌係電盈旗下香港電視娛樂，奇妙電視則仍「處理中」。有一說，亞視「遺留」UHF頻率，最大機會由兩家新獲免費電視機構申請獲得。不論邊家獲大氣電波，經營能力一定比亞視優勝。假設免費電視整體行業收入不變，市場萎縮，TVB經營更難，肯定不言而喻。

但電視「黃金頻譜」大氣電波係珍貴公共資源，亞視有六條數碼頻譜（一條高清同五位標清），唔通港台頂上？六條都分配畀新免費電視台，TVB馬上死得。呢六條「黃金頻譜」主要用於廣播用途，蘇局長已講兩台原本申請用固網，不可話改就改，潛台詞係：電盈及奇妙未必獲得分配。

免費電視台想要頻譜，肯定出盡九牛二虎。除咗電視台，流動營運商亦對頻譜分配虎視眈眈，黃雀在後。

本港流動電訊嚴重缺乏頻譜，470-806MHz嘅UHF頻譜，全用於電視廣播會唔會改變？數碼廣播後，頻譜容量大增，唔少國家先後釋出一段UHF頻譜改作流動寬頻，美國就拍賣700MHz頻譜（698MHz 至 806MHz），AT&T和Verizon投得營運權。亞視頻道37(599.25-605.25 MHz)用於數碼電視廣播，本港700MHz頻譜由各台佔用，港台嘅31、32、33台就用緊最尾一段(798-806 MHz)。

700MHz頻段折射及散射效果，較2G～6GHz理想，即使不存在直線通訊(LOS)，仍可確保通訊品質，亦解決覆蓋不良及室內穿透性等困難，最重要係大幅降低建網成本。各國政府先後釋出700MHz作流動寬頻，台灣嘅700MHz（包括Band 12、13、14、17、28、29、44）頻譜分別由亞太、遠傳、國碁、台灣大哥大四家所瓜分，亦係最早使用700MHz地區，日後支援700MHz手機肯定愈來愈多，割為流動寬頻大勢所趨。

ITU一直建議各政府分配700MHz 頻段作為流動寬頻，本港流動頻寬嚴重不足，上網更係龜速。但係2014年，政府宣佈模擬電視廣播延後到2020年終止，原本先等模擬廣播終結（ASO, Analogue Switch-Off）重新分配頻譜，所以押後釋出700MHz 頻段。

如今亞視提早交回頻譜，港府可能加快調動，港台接收亞視頻譜整合頻段，再拍賣700MHz頻譜，提高流動頻寬效率，似乎係最可能發展。電盈經營免費電視，但亦係流動營運商，拍賣700MHz頻譜，當然舉腳贊成。「好奇妙」嘅奇妙電視，開唔開台都成疑問，更係無乜意見可講。