2015年4月29日星期三

華為公共雲聯想


全球最大LTE設備生產商華為,供應咗全球營運商超過一半LTE 4G網絡設備。LTE開始陸續落成,華為尋求新增長動力來源,積極加入SDN/NFV產品,通過專業服務維持收入增長。

華為亦加入史丹福及柏克萊大學Open Networking Research Center (ONRC),支持Open Networking Operating System (ONOS)計畫,以SDN/NFV服務收入支持增長。華為亦拓展企業IT市場;但係營運商可以直銷,企業IT市場講求Channel管理,華為正全球招募合作夥伴,香港區委任嘉靈電子任分銷。華為管理銷售渠道,仍處於學習階段,短期內好難扭轉形勢。

今年七月,華為宣佈推出公共雲(Public Cloud),同AWS及Azure等競爭。華為調整企業部門策略,寄望2019年達到100億美金營業額目標。

雲運算大行其道,搶去設備商唔少生意,賣鐵愈來愈艱難。但係IT方案支援混合雲功能,可能帶來新機遇。華為講求自主開發,CEO徐直軍話華為公共雲,會為企業客戶帶來驚喜,背後理念係開發企業IT市場;除咗靠產品以外,加埋雲服務,公共雲直接配合IT設備銷售,並非異想天開。華為儲存設備,應該率先支援公共雲。

華為進軍公有雲,亦唔見得會與營運商有衝突。營運商最大頭痛問題係被網上OTT搶咗唔少生意。華為正催谷視像串流業務,希望為營運商開拓新收入來源。

沒有留言:

發佈留言