港產制式揚威國際

近年香港矽谷鴨記，無線充電技術Qi產品，最便宜一百蚊包無線充電座，支援唔同品牌手機同平板無線充電。本港天祥公證行(Intertek香港)宣佈成為全球第一家獲無線充電聯盟（WPC）認可，為Qi無線充電產品進行測試和認證服務檢測機構，呢個制式其實算係港產，認證服務亦首先落戶香港。

Qi係多家廠商組成Wireless Power Consortium (WPC)支援嘅無線充電標準；成員有唔少手機廠商，包括華碩、HTC、華為、LG、摩托羅拉、諾基亞、三星、新力、BlackBerry、飛利浦、樂聲等。

以前，無線充電只係用嚟充牙刷同電鬚刨之類，又無共同標準，唔可以互通，未來Qi無線充電，支援所有隨身電子產品；除咗手機電腦，穿戴式設備甚至IoT物件，只要在無線叉座上一放，乜叉都叉得，大家同電源線講拜拜。

全球無線充電技術，從三大陣營變成兩大陣營；舊年Alliance for Wireless Power (A4WP)與Power Matters Alliance (PMA)合併，建立統一核心充電標準AirFuel Alliance；AirFuel以美國廠商為主，包括全球三大晶片巨頭，英特爾、高通、Broadcom，仲有AT&T、Duracell、Starbucks、Powermat、Flextronics、美國官方聯邦通訊委員會FCC、Energy Star，星巴克咖啡連鎖店，同Qi分庭抗禮。

Qi無線充電標準來自一家科學園初創公司，創辦人Camille Tang鄧蘊美，畢業於史丹福，原本飛利浦打工，發現無線充電有前途，2006年從城大許樹源教授（目前許教授已去咗港大）購入技術，成立ConvenientPower發展出Qi標準雛型。Camille周遊列國游說廠商成立工業標準，推動Qi無線充電制式，目前Camille仲成為WPC副主席，發展成為工業生態，中國大陸更有唔少廠商支持。科學園亦用Camille做Innovation Heroes 創新英雄廣告生招牌。

反觀AirFuel剛合併嘅兩大陣營技術仍唔多兼容，為免被Qi邊際化急忙成立AirFuel，普及程度亦唔及Qi。Qi甚有機會成為本港萌芽，橫掃全球既無線工業標準！如今Qi充電產品成行成市，消費電子生態又全在亞洲區，AirFuel可唔可以後發先至？