今年科技預測

踏入2016年，唔少人講今年走勢。最熱炒概念可能係人工智能。I記投資人工智能，稱之為Cognitive Business，Watson以機器學習、數據分析等技術，幫助商業決策，最大應用潛力似乎係醫療，可以用嚟幫助斷症。電動車Tesla老板Elon Musk亦開咗非牟利組織OpenAI，專門研究人工智能。

研究機構IDC話AI可能變身成第四平台。人工智能首先要學講聽人講嘢，聽得明慢慢再學，搜尋出最佳答案，然後答得啱，作出準確建議；上次講起百度深度學習，聽普通話及英語，準確率係99%。老板李彥宏話，百度大腦只有兩三歲智力水平，寄望十幾年後聰明過人腦。AI飛入尋常百姓家，就係以雲運算結合流動設備，可通過機器學習，再逐漸改善答案嘅準確率，相對於Google Now人聲辨識率只有約92%，百度已大有進步。Siri報稱準確率95%，（聽力水平，以廣東話聽可能唔同），但答案好多時九唔搭八，相當離奇。咪記Cortana辨識率不詳，更暫時唔支援香港區。Amazon推出家庭人工智能家電Echo，用雲端聲音辨識技術Alexa，但只識回答簡單問題，包括吓介紹Amazon產品。

人工智能有乜商業價值？仍係未知之數，但今年資金湧入可能性相當高。因為肯定係使用率上升後，人工智能愈嚟愈聰明，預測能力一定可以提高。

大家可能想問，雲高爾被炒機會幾高？達叔狀態幾時回勇?答到以上問題，人工智能就可能真係叻過人類。