創科副局搞開雲運算

上星期楊局長終於委任副局及政治助理，副局雀屏中選係數碼港David Chung。鍾博士在數碼港做CTO，搞過全港第一個以OpenStack為基礎嘅Community Cloud，支持唔少公開源碼計畫。未來政府亦推動雲運算，必須同國際接軌。David曾推動OpenStack到港舉行峰會，任副局實至名歸，希望可加快興建更多數據中心，普及雲運算。

較早前，行政局成員查太上電視，提及本港金融科技已經滯後；例如REIT同埋群眾募資（Crowdfunding）法例都落，後者分分鐘被告非法集資添。全球數據中心主要以REIT方式融資，香港REIT發展得最早，如今法例就最落後。群眾募資更加唔駛講，所以科技同金融專家一齊檢討本港金融監管太過嚴格，亦窒礙流動支付服務發展。例如阿里巴巴關聯公司螞蟻金服旗下的支付寶（Alipay）同埋騰訊WeChat錢包，已經發展海外市場。上星期，騰訊响香港推出WeChat錢包(微信錢包)測試版，更新WeChat之後，就有機會看到「錢包」出現WeChat「我的設定」內，按指示綁定信用卡後就可以消費；但係P2P轉賬同收發紅包等熱門功能就未有。

騰訊唔能夠從銀行轉賬至錢包，錢包只剩擦卡功能，過唔到數；主要係香港銀行好難過金管局一關，同流動支付業者分享資料，暫時傾向用WeChat做查詢戶口同發安全訊息，銀行每月用SMS發訊息費用唔少，WeChat取代短訊慳番一筆；但流動支付就暫時好難打贏八達通。

不過，流動支付比八達通更方便，內地可以用嚟泊車，小販商亦可以用手機，甚至只係QR Code就可以低成本開檔。反觀八達通，租拍卡機價錢唔少，好多商販已經放棄咗，八達通註定無運行。

八達通如果無辦法推出新服務，政府可能應從大局著想，引入競爭，放流動支付業者一條生路。