儲存系統世代更替

近年儲存格局出現變化，除咗超融合廠商興起，NAS首當其衝受影響，物件儲存（object storage）愈來愈多，IBM收購Cleversafe，算係物件儲存領導者，而HDS推HCP平台。

儲存格局改變，多少由雲儲存及流動技術帶起，物件儲存可結合混合雲，更支援非結構性數據，所有流動應用都要用到物件儲存，又搶去唔少NAS技術市場。

此消彼長，NAS儲存商NetApp股價跌到低位，傳言思科即將收購，臘鴨曾市值跌破七十億，一年蒸發一半。

雖然話，思科同臘鴨共同銷售Flexpod方案，加上思科淡出VCE聯盟，有人臆測思科收購臘鴨，可擴大Flexpod市場。但思科會唔會押注在輸家，抑或轉而收購超融合方案，再整合到 UCS，對抗 VMware嘅NSX？

精略計算，融超合廠商有五十幾家，思科更加係Stratoscale等OpenStack超融合架構嘅天使投資者，收購Stratoscale可能仲化算。

另外，快閃技術興起，又係另一支生力軍。除咗 EMC推xtremio，純快閃方案陸續有嚟。HDS首席技術顧問Douglas Lo話，HDS擁有快閃晶片控制技術，已生產出極速全快閃（All-flash）列陣（另一家擁有兩種技術嘅公司係華為，屬下海思半導體研發晶片，今年亦推純快閃）。HDS嘅VSP G1000全快閃IOPS突破二百萬，全球最快。Douglas話快閃有唔少優勢，除咗VDI肯定唔會有 Boot Storm，掃毒亦唔影響任何性能。

近年銷情唔錯嘅Veeam開始力推V9，用快速複製（Replication）技術，達到接近持續數據保護效果，唔少人用作儲存系統數據轉移。新版本又加入 DRaaS功能，支援雲端災難容錯。但以實時複製技術作災難備容，其他廠商有唔少新產品，例如以色列廠商Zerto，就有唔少公司採用，亦支援Hyper-V。