工業化開發軟件

FlexSystem係本地品牌財務軟件業龍頭，本地同國際有唔少財務軟件客仔，Adam話，FlexSystem老細Adam Lok話，開始進軍人力資源管理軟件，歐洲最大人力資源企業之一亦係用緊渠哋產品。

本地上市公司唔少用FlexAccount；FlexSystem脫穎而出，主要係Adam好注重軟件架構設計，早利用五層架構，虛擬化客戶端同數據端設計，打破用戶介面同應用嘅邏輯關係。雖然話，用戶終端技術經數代變遷，甚至進入流動時代，FlexSystem仍不斷更新，適應到唔同應用介面。

軟件業內，唔少產品同幫客人度身訂造，但呢類軟件開發又好難賺錢；原因係從取得客戶要求後，甚至到產生源碼，過程中好多改動，有時愈改就愈多錯，軟件業又無統一標準，唔少度身訂造軟件，到最後經多重修改，尾大不掉。

度身訂造軟件業困難之處，係從客戶攞咗系統要求後，再交由程式人員寫軟件，開發人員經驗又有限，頭痛醫頭，最終錯漏百出，Adam設計出一套方法，簡化用戶建立軟件流程，從系統分析直接自動生成應用系統，確保軟件質量。呢套系統減少度身訂造軟件成本，已經開始為銀行設計管理資產組合系統，將來打算其他度身訂造軟件，亦用同樣方式生產，節省七成開發成本。Adam稱之為工業化軟件生產，可為FlexSystem產品，打入另一片藍海。

上期提及，中國VR出現爆發增長。剛接到IDC研究報告，今年中國VR市場，預測增長超過四倍，類似Rovio及Supercell等遊戲內容製作公司前景唔錯。舊年，股王騰訊以八十六億美金高價收購Supercell八成四股份，係騰訊有史以來最大宗收購。今年Supercell有唔少VR內容推出，《Clash of Clans》甚至已在YouTube推出VR內容。收購Supercell後，今年騰訊可在VR市場大舉收割。