2017年4月5日星期三

一山不能藏二虎


上周,原EMC大中華總裁Denis Yip,終於在與Dell世紀大合併後離開。神州數碼公佈,Denis過檔任首席執行官,即係CEO。神州數碼控股採用雙CEO制,林楊繼續擔任CEO兼執行董事。

Denis Yip曾任IBM全球副總裁,又做過亞太區存儲事業部總經理,亞太區AS400總裁,大中華區AS/400RS/6000業務部總經理等,曾又响廣州,北京,東京,上海負責IBM 業務,曾經係I記最年輕全球副總裁,經驗相當豐富;曾經EMC論壇見過Denis,渠話最怕去美國開會,今次轉去神碼,唔駛再經常赴美矣。

國內有唔少企業用雙CEO制,華為就用輪值CEO,阿里亦試過雙CEO,不過上述兩家公司無論幾多位CEO都好,老大都只有一位。外國方面,SAP亦有實行過雙CEO制,Bill McDermott同埋Jim Hagemann Snabe一齊出任,後者無耐退位讓賢,可能係一山不能藏二虎。
上月,Snabe同時被兩家老牌歐洲工業集團,任命為董事會主席,馬士基(AP Moller-Maersk)及西門子(Siemens)同時延聘Snabe做主席,風頭一時無兩。無獨有偶,Snabe亦曾經在IBM任職,然後轉到SAPSnabe完全無工業經驗,前兩份工都係同軟件有關。上述兩家老牌工業集團,同樣話希望Snabe可用軟件業經驗,協助公司數碼化轉型。不過,馬士基剛公佈業績相當麻麻,2016年淨虧損達到十九億美元,運輸及能源業務雙雙受壓,真係已到非轉型不可地步。

沒有留言:

發佈留言