IT市場變天

上星期AWS開高峰會議，國泰航空 IT部門總經理Lawrence Fong上台現身說法，講點樣利用AWS，解決國泰一年前IT服務困境，而國泰亦似乎會利用AWS作Agile development，加快應用開發周期。國泰航空一向採用I記及O記設備，結果竟被AWS取代，亦始料不及。

舊年六月左右，國泰網上訂票系統因為技術問題一度關閉，連熱線電話都無法打通，乘客怨聲載道，結果被AWS冷手執咗熱煎堆；Lawrence Fong作為客仔，IT部門大把筆席，無必要為邊一家公司唱好，鳴鑼開道，今次願意親身上台推薦，當然肯定係由衷之言。奇就奇在香港賣雲服務，又唔係AWS獨家經營？其他公司可能顧住推銷硬件，萬一漏萬，當然未必願意建議客仔用雲，結果反被乘虛而入。

AWS開始在香港興建數據中心，大展拳腳，擴充當然要請人，求才若渴。雖然話在AWS打工，收唔少股票，以AWS增長趨勢，亦好容易發達。今次AWS高峰會，竟遇見前HP公關大員Linda Yung。AWS即將在本港有唔少破席，特別係開發金融服務業市場。Linda一直為HP開發企業市場，加入AWS，預見雲服務市場，肯定相當熱鬧。

AWS最大競爭對手當然係Azure，唔少企業因為Office 365，採用Azure服務，Azure亦積極推出新服務，連續減低收費迎戰AWS。

I記嘅BlueMix亦不斷加強宣傳。側聞Francis Ngai坐正後，好快會改組部門，減少設備部門同雲服務之間衝突。傳聞O記亦正進行史上最大一次改組，整調業務方向，完全以雲服務為焦點。

上星期O記公佈業務，收入比預期好，股票升到新高，雲服務IaaS收入有兩成幾
增長，同期AWS收入增長，就達到四成幾。2017年首季，AWS雲服務收入達到
三十七億美金，實在驚人，其中營業溢利達到八億九千萬美金，原因之一係獲得
唔少大企業客戶，AWS進攻企業市場只係剛開始，其他對手恐怕要嚴陣以待。