VC新制式

近期感冒大爆發，好多人病咗。唔少公司又開始搞番視像會議VC，以免影響正常運作。聽思科嘅Fiona講，下年Webex會推出新嘅版本，加強群組合作性能，叫做Workplace。佢哋今年亦唔需要再飛美國開周年會議，利用VC响香港就搞掂。

不過，高檔VC一向都係Tandberg同埋Polycom嘅天下，除咗專用硬件價格好貴，亦要裝專線先至有理想效果。不過，市面出現唔少上網，甚至用3G流動網絡都可以運作嘅VC產品，舊年思科亦在佢哋UC產品，加入咗一種响不同網絡環境，都可以運作嘅VC。其實呢種VC產品，源自一種新制式，叫H.264/SVC。思科係向一家叫Vidyo嘅廠商，授權H.264/SVC嘅技術，响唔穩定網絡環境，一樣傳送清晰流暢嘅畫面，而且唔會有格仔，可以慳好多錢，相信未來將成主流。

啱啱亦叫到料，話中信1616亦安裝咗附屬公司CPCNet嘅VC2方案，同樣亦係採用Vidyo嘅技術。Vidyo嘅亞太地區銷售副總裁叫Afred Chase Hui，以前就係Tandberg嘅老頂，又曾經做過Juniper嘅地區總經理。不過，聽講Vidyo嘅SE，叫做Jeffrey Yung，最近過檔藍衣人，證明廣域加速市場，目前可能好做過VC。