雲運算搞鐵路

北京參加I記中國研究開發中心開放日，遇到港鐵IT部門阿頭Daniel Lai，先知港鐵原來亦搞雲運算，十月推出了物業管理嘅雲運算平台。此外，佢哋又諗緊响港鐵友禮會MTR Club網站，利用雲運算提供互動功能，例如Google Mail同埋Google Map，俾網友互動，發掘更多好玩地點。

賴會長話到咗2020年，中國嘅高速鐵路嘅總和，長度達一萬六千英哩，超越全世界高鐵加埋一齊，投資額超過三千億美金！中國未來猛起鐵路，生意機會唔少。I記搞咗一個 Global Rail Innovation Centre，又响中國開檔，專門搞「聰明鐵路」，港鐵高層獲邀加入。港鐵嘅IT化同系統，全世界公認最好，外國高鐵包括新加坡同埋台灣，都曾嚟過香港取經。

Daniel曾經提過，想透過雲運算技術，將香港一啲成功鐵路管理系統經驗，以SaaS俾國內鐵路系統使用，I記國內政府關係咁好，一定幫到手。I記嘅Florence話，港鐵曾經係HP大本營，合併時搵I記幫過手，未來合作機會愈來愈多。佢話港鐵用哂O記嘅ERP，但係整合時就用咗I記嘅諮詢服務，結果成為O記最大整合商。

上星期見到摩記亞太區阿頭Drina Yue，佢曾經係美國Bell South工程師，親手開發過好多電訊專利，後來調去北京加入摩記。摩記嘅焦點已集中係光纖到戶同埋極速流動寬頻，國內同東南亞都有唔少客仔，流動電話唔再當道，唔怪得搵一位通訊專家嚟坐鎮。摩記外部通訊經理Cordia So，以前係Tandem做過，原來係舊相交。