GPS導航大戰

華碩出咗隻新手機M10，芒比上一代大，加埋新版Garmin衛星導航，價錢只係三千鬆啲，仲比上一代平好多。Garmin係 GPS大廠，近年Google同諾基亞紛紛發展衛星定位，各擅勝長，Garmin同埋TomTom等產品，吸引力亦無以前咁大。國產嘅GPS，香港矽谷鴨記成行成市。不過Garmin導航技術發展好耐，成熟程度頗高，可以提示下條路段，好醒目。

Google支援好多平台，又有街景，導航可以睇埋，一定唔會搵錯地方。如果加埋電子指南針，真係好似親歷其境咁，搜尋速度快而準，抵讚。上個月尾， Google手機本港嘅導航測試版，終於千呼萬喚始出來，暫時只適用Android，但準確性真係尚待改善，相信好快會正版出籠。不過香港地圖用簡體字，又俾好多網民投訴緊。

諾記下載地圖到手機，即使電話無數據服務，去到外地搵到衛星，一樣可搵到位置，亦可導航，更可在電腦網站Ovi戶口內，預先載入目的地或者行程，預先「昇」去手機，或者將手機上搵到嘅旅遊地點，用衛星定位記低，返屋企「昇」上Ovi戶口同人分享，好鬼方便。諾記導航聲音好多選擇，暫時最先進。

講番華碩，除咗支援GPS，網上流行Cook ROM，最出名嘅工具係Bepe寫嘅Kitchen工具。支援嘅手機，除咗HTC之外，最多機種可能就係華碩。華碩嘅超平手機P320，由於夠平，一度變成一代擦機王（可以擦新不同嘅ROM，添加功能 ），網上唔少發熱友烹咗唔同嘅ROM，速度比原廠仲快，功能更多，好有個性。如果想玩手機功能變身，過足癮，基本上唔用原廠版本都無問題。手機發燒友，一定揀華碩。