iPad殺手

上星期，最大新聞可能係M記滑鐵盧，真係俾傳媒笑到臉黃。

一般防毒軟件都係自動更新，所以出更新要好小心，否則防毒變咗中毒，就唔係幾好。今次死對頭單記可以話飲得杯落，M記今次商譽損失好大。M記舊年收購唔少公司，近期亦請咗唔少人，早前見到Cyberworld嘅Henry，B&Data嘅Patrick，原來去咗M記。

HP終於完成收購3Com，思科亦完成收購Tandberg，各有新發展。講起HP，IPG嘅本港舊老頂Alice，亦响上個月悄悄離任。IPG曾經係HP主要盈利部門，管理嘅範圍好大，Alice可以話一手湊大IPG，盛極而衰，真係天下無不散筵席。不過Alice口才了得，肯定炙手可熱。

時移勢易，HP嘅業務重心轉移到技術服務，自從收購EDS後，已經係向I記宣戰。收購3Com，就係挑戰思科，幾個月前，思科同HP劃清界線。上期時代周刊亦以新 HP為題，大造文章，除咗話Slate係iPad殺手（證明作者真係唔識電腦），內容無乜新意。3Com响中國（其實係H3C）做得唔錯，不過HP响網絡市場異軍突起，真係唔容易。

高階網絡市場，仲係思科豬扒之爭，特別响金融同電訊市場。好似聯交所網絡升級，P仔拍住思科，九記拍住豬扒，基本上只係兩雄相鬥。

交易所係本港三大重要客仔（其餘係馬會同埋機場），豬扒做過紐約證券交易所Euronext，P仔就仍係交易所最大供應商，近年九記不斷入侵，肯定不惜工本打保衛戰，交易所一向係思科嘅地盤，鹿死誰手，八月有分曉。HP要打入呢啲市場，除非同電訊商好熟，否則想要入圍，都無機會。