I記活動多

近期最多活動嘅公司，可能非I記莫屬，早排就不斷推儲存，公佈完eX5之後，軟件部門又講雲端，又講Maximo，又做Lotusphere，然後又推舊年購入SPSS，遲啲又話有Power 7，一路直落。

講起SPSS，讀社會科學嘅人可謂無人不講，以前曾經响IBM主機上用過，然後又用過PC版同埋網絡版。唔知點解，市場上廿幾年獨市生意，無人同SPSS競爭，同IDC研究軟件嘅Wilvin Chee講起，佢哋都係用緊SPSS做統計，結果舊I記用十二億美記買起，原來全公司不足五百人！真係精兵簡政。

更驚人係，原來SPSS有近一半研究人員都响西安，大部分開發遷移往中國大陸。佢哋首席統計員石靜雲係台灣人，後來去咗芝加哥，佢話大部分人叫中國做Outsource，佢哋就叫做Insource。中國已經成為研究開發大國，搶咗矽谷唔少業務。I記响GBS以下，亦開多咗叫BAO，即商業分析及優化，專門推SPSS，話唔遲啲香港老頂Vincent Wong都會出嚟推吓。

公關大姊請眾人去FCC，講起咪記幾代公關，都話咪記份工好辛苦，據講第一代嘅Lily小姐，原來要帶睡袋返工，不過佢後來去咗北電（未出事前），然後再去AIG（亦係未出事前），再去北京諾記，嫁個有錢人。

咪記要做到瞓公司，係好耐之前嘅事。當時人比較少，又响太古城，至少比較方便。