思科摺埋Flip

近期擦牙唔勤力，所以口臭。上星期講開思科嘅Flip傻瓜錄像機，估唔到話口未完，Flip就宣佈摺埋。

思科收購Flip動用約五億九千萬美記，响美國曾經打咗唔少廣告，今次執咗Flip，唔選擇出售，唯一解釋係根本無人對呢項產品有興趣。思科手頭現金超過四百億美記，今次當做吓實驗，濕濕碎。做生意呃人就好，呃自己無謂。

思科向視訊科技進軍，最大一單刁係購入Tandberg，作價三十三億美元。而O九年亦購入香港上市嘅天地數碼DVN機頂盒業務，用咗四千四百五十萬美元。但據今年第一季業績，思科機頂盒業務北美市場下跌達四成，可能係傳統機頂盒市場萎縮，唔關DVN嘅事。

今年以來，思科已收購三家公司，其中一家叫Inlet（當然唔係Intel），呢家公司亦係做Adaptive Streaming視訊串流技術，蘋果嘅IPTV就係用Inlet技術，而呢項技術據講亦係未來IP視訊最重要技術之一，亦只係用咗九千五百萬美元。

雖然話思科傳統路由器及交換器業務仍有增長，CRS-3高端路由器亦開始供貨。但係網絡市場仍係最大收入來源，其中有HP收購之後嘅3Com、Brocade、Extreme，仲有最大嘅豬扒，競爭劇烈。思科股價近期從高位回落達四成，相比起豬扒只係回落一成半，好多人對思科前景有戒心。

事實上，收購科技唔係咁容易搞。HP曾經收購中間件公司 Bluestone，結果亦係全軍覆沒。最近收購3Par，之後收購Palm，亦引起唔少爭議。

最近好多保安會議，其中一次請來「資訊工房」嘅Paul馮德聰先生，馮先生係行內人，屬自由黨人，講到IT嘅知識，恐怕多過民主黨兩位IT政治明星加埋乘二，開會亦攞民主黨嚟開玩笑，馮先生亦有個網誌，叫Mindfarm (http://www.mindfarm.com/)，其中有段Orion電視台話，美國用機器人開玩笑，話應該林瑞麟搞出嚟。