軟件吞噬世界

上個月，Singtel嘅客戶方案顧問北亞區主管Simon Lok上台講雲端運算，話下一波雲運算數據中心，會係網絡虛擬化，網絡嘅第三層上，再建立虛擬化第二層同第三層，令內部網絡同外部雲，形成同一IP架構。大家可能唔知我講乜，唔緊要，其實我都唔係好知。

Simon Lok又向觀眾介紹一家叫Nicira嘅公司，渠話呢家公司，解決咗好多以往網絡整合嘅頭痛問題，非常之Disruptive，點知講完之後，台下鴉雀無聲。事後Simon話，呢家公司真係好有前途，港府都研究緊採用渠哋方案。點知唔夠兩日， VMWare就宣佈收購Nicira，收購價盛惠十二億六千萬美元，IT評論一致認為，收購物有所值，VMWare稍跌後回升。

Nicira創辦人就係著名網絡標準Openflow開發者，創業不過五年，半年前推出產品，但投資者大有來頭；包括科技風險基金Andreessen Horowitz，Andreessen就係Netscape創辦人Marc Andreessen，曾同Ben Horowitz一同創辦咗Opsware，結果2007年以十六億現金出售畀HP。2009年Marc Andreessen以二十七億五千萬美金，收咗Skype主要股權，2011年再以八十五億出售畀咪記。渠哋亦係Twitter、FaceBook、Groupon同Foursquare嘅投資者。舊年Marc Andreessen為華爾街日報撰文，題目係「點解軟件業會吞噬世界？」，預言軟件業再次發圍，改變世界經濟。渠亦係HP嘅董事，力催發展軟件部門。

類似Nicira，應該係豬扒或思科收購對象，竟然畀VMWare捷足先登，Nicira就係軟件吞噬世界最佳例子，足以取代所有主流網絡設備製造商。豬扒早已經開發緊Space，概念亦係軟件控制網絡交換，近年買咗好多軟件。五月份，豬扒又注資專門做視像會議嘅Vidyo，呢家公司亦係以軟件，任何設備上可做HD視像，亦唔駛安裝MCU作多方會議，如果成功，做視像會議設備公司嘅都會收皮。美國IT公司，家家想變身軟件公司，各施各法。

上星期專攻第三代防火牆PaloAlto嘅上市後股價理想，即刻升咗兩成幾。