電腦電視廣告

上星期，分銷商忙於推Windows 2012及8仔，又預告加價，拍乸落單請早。為兩個平台做勢，聽講話即將有大型廣告攻勢出街，集中電子媒體，電視廣告筆直唔細。

咪記食粥食飯，要睇呢兩項產品生唔生性，iOS同Android來勢汹汹，8仔要翻身唔知有乜板斧。

Windows 8主攻流動平台，介面無石破天驚。可唔可以靠電視廣告改變形象？大家拭目以待。不過以電腦電視廣告，最經典依然數1984年，蘋果教主喬布斯，以George Orwell名著《1984》為主題，諷刺IBM嘅電視廣告。呢個廣告之經典，係形象化蘋果乃挑戰權威嘅公司，不甘心於平庸，幾乎為品牌形象一錘定音，顯示科技之「顛覆性」（Disruptive），一夜之間改變市場。

時移勢易，IBM從個人電腦退出，咪記竟然反而處於守勢。Windows廣告又會唔會一如既往，介紹熟口熟面介面功能？誠如教主所言，咪記並不乏技術，只係品味差啲。