網絡保安陸續有嚟

講起人事變動，IT行業經常流動。轉行最離奇，係前馬會IT老頂Sunny Lee，竟然去咗城大做副校長；專管行政。之前有傳言，話Sunny會去醫管局，但後來竟然入咗學術機構，但渠另亦擔任城大數據保護主任（ Data Protection Officer），算係同IT仲有啲關係。

講起保安，聽講另一家叫ZScalar雲端保安亦不斷亞太區請人，部分防火牆有人過檔。今年以保安產品，最火紅當然係針對APT嘅「火眼」（Fireeye），火眼老頂David DeWalt講，話火眼今年就緒上市，本港亦開始有金融機構部署火眼。不過目前火眼在日本市場表現較好，其他市場就仍處起步。

上月，Palo Alto開始推出「野火」（ Wildfire）WF 500，對付APT嘅專用設備，皆因上一代「野火」以雲運算為基礎，唔少金融機構資料，不可以傳送檔案到防火牆以外驗身。推出WF 500後，「野火」正式同火眼正面競爭。

斯諾登事件後，先知美國入侵外國網絡，可如入無人之境；APT開始受關注，聽講唔少公共機構已中招，單靠防火牆，基本上無乜作用，下年應該有更多有關 APT產品。

講番比較貼身話題，紐約時報選出挑戰「唉峰」嘅六大國產手機，小米2當然榜上有名；其他包括酷派8920、華為Ascend P6、聯想K900、中興Grand S、OPPO Find 5，其中最佳外觀應該係用英特爾Atom雙核Z2580嘅聯想K900最靚仔，5.5吋熒幕，但暫時仍未在港發售。