買菜簽卡

講起流動支付，上星期PCCW Mobile內部開始同恒生銀行測試Mastercard合作嘅PayPass NFC手機，但NFC手機用途好廣泛，唔單止可以做電子錢包，作感應式流動支援，亦可取代電子機票、身份認證，甚至作為控制出入嘅 Pass，新加坡已經出咗NFC戲飛，用戶身份經由營運商認證，絕對安全，唔需要發行智能卡，數據又可隨時更新監察。目前香港各大流動營運商都請緊人，磨拳擦掌開拓市場，呢方面要好多ICT同保安技術整合，簡直係一片新藍海。

Visa則登招聘廣告，請Business Development Leader，專搞mobile POS（mPOS）。舊年底Visa聯同大新銀行，推出全港首個Pay@Mobile，利用Swish嘅mPOS設備加上iPhone，變成流動POS，專供小型商戶甚至個體戶用信用卡收款，仲可以接納EMV晶片卡。

今年初，Visa入股美國嘅Square，自從呢家公司响mPOS響朵，支援iPhone用嘅做POS，全球出現咗無數mPOS設備（但上一代Square唔支援EMV晶片，所以唔可以進軍歐洲，亦應該唔會來港）Visa又先後認證多家歐洲mPOS設備，包括有歐洲Square之稱嘅iZettle，獲得Visa Ready認證，有一家叫亦獲通過嘅Miura Systems甚至有藍芽連接POS。Visa向銀行推銷mPOS，時機成熟，設備選擇愈來愈多，智能電話越來越平，歐洲甚至有向小商戶免費送mPOS，將來去街市買菜，可能都可以簽卡。