I記成為軟件公司

講開矽谷大亨，今年Fireeye股價表現矚目，保安股份上市陸續有嚟，其中一隻預計會係Zscaler。Zscaler創辦人Jay Chaudry曾創辦唔少公司，包括CyberTrust，後出售畀Secure Computing，最後再出售畀賣咖啡，聽講渠唔會出售Zscaler。Zscaler另一位傳奇人物係Lane Bess，曾任Palo Alto老頂，目前係Zscaler嘅COO，曾話渠PAN上市後退休，終於東山復出，聽講因Zscaler前景太好，決定再推Zscaler上市先收山。

上星期另一單大刁，聯想以二十三億美金，購入I記嘅X86伺服器生意。PC業務持續萎縮，聯想進軍流動市場，亦向伺服器市場。聯想一直有生產I記低檔伺服器，今次收購包括System x、BladeCenter、Flex System等。而Flex System更係I記針對數據中心嘅集成系統，針對思科UCS，絕對係高端產品。

I記Power業務亦持續向下，影響系統部門業績 ，唔少客戶陸續利用X86伺服器加上Linux同虛擬化，取代Power同AIX等，相信只有System z主機仍然有睇頭。I記業務靠軟件帶動，已無可置疑。

上星期見到聯想香港區總經理鍾孝揚，曾做過三星同信興電器，電子消費市場經驗豐富，聯想更多消費電子產品出籠，可以預期。今次收購埋X86伺服器生意，相信渠有排忙。聯想訂價非常進取，X86市場又有一場屠殺，幾乎可以肯定。

上星期中國內地網絡癱瘓，原來中國超級防火牆（Great Firewall，GFW）出咗問題，所有中國上網嘅訪問，轉發往美國懷俄明州一家叫Sophidea公司嘅伺服器，而Sophidea則利用另一家技術公司Dynamic Internet Technology嘅閘道。兩者公司都經營同一項業務，就係做「翻牆」，中國網民唔少利用Proxy，用嚟過訪問受GFW阻截網址，呢兩家公司經營類似業務。懷俄明係全美最少人口州份之一，全州只有五十萬人，之前李安「斷背山」而揚名，今次則中國斷網為世所識。